கனிமவளம் எடுக்க அப்பகுதி மக்கள் கருத்து அவசியமில்லை' - மத்திய அரசு உத்தரவுக்கு எதிர்பபு

கனிமவளம் எடுக்க  அப்பகுதி மக்கள் கருத்து அவசியமில்லை' - மத்திய அரசு உத்தரவுக்கு  எதிர்பபு

இந்தியாவில் முக்கியமான கனிமங்கள் மற்றும் அணுக் கனிமங்கள் சார்ந்த திட்டங்களுக்கு இனி பொதுமக்களின் கருத்து கேட்பு தேவையில்லை என்று மத்திய சுற்றுச்சூழல் அமைச்சகம் சமீபத்தில் உத்தரவு பிறப்பித்துள்ளது. இந்த அறிவிப்புக்குப் பிறகு, சுற்றுச்சூழல் ஆர்வலர்கள், சமூக ஆர்வலர்கள் உள்ளிட்ட பலரும் அதற்கு கடும் எதிர்ப்புத் தெரிவித்துள்ளார்.

"மக்கள் வாழ்வும் சுற்றுச்சூழலின் பாதுகாப்பும் தொடர்புடைய திட்டங்களில் மக்களின் கருத்தை புறக்கணிப்பது ஜனநாயக உரிமைகளை பறிப்பதற்குச் சமம்" என அவர்கள் வலியுறுத்துகின்றனர்.

மத்திய அமைச்சகத்தின் நிலைப்பாடு

சுற்றுச்சூழல் அமைச்சகம் வெளியிட்ட தகவலின் படி, இந்த உத்தரவு மத்திய பாதுகாப்பு அமைச்சகம் மற்றும் அணுசக்தி துறை வைத்த கோரிக்கைகளின் அடிப்படையில் எடுக்கப்பட்டுள்ளது.

தேசிய பாதுகாப்பு

வியூக ரீதியான (Strategic) தேவைகள்

என்ற காரணங்களுக்காக, இத்தகைய திட்டங்களில் பொதுமக்கள் கருத்துக் கேட்பு (Public Consultation) தேவையில்லை என குறிப்பிடப்பட்டுள்ளது. 2006-ம் ஆண்டின் சுற்றுச்சூழல் தாக்க மதிப்பீட்டு (EIA Notification) விதிகளில் செய்யப்பட்ட திருத்தத்தின் படி, அணுக் கனிமங்கள் மற்றும் "முக்கிய கனிமங்கள்" தொடர்பான திட்டங்கள் அனைத்தும் இப்போது மத்திய அரசு மட்டத்தில் மதிப்பாய்வு செய்யப்படும்.

உத்தரவின் முக்கிய அம்சங்கள்

அணுக் கனிமங்கள் (Nuclear Minerals) தொடர்பான அனைத்து சுரங்கத் திட்டங்களும் விலக்கு பெறும்.

முக்கிய கனிமங்கள் (Critical Minerals) - சுரங்கங்கள் மற்றும் கனிமங்கள் சட்டத்தின் முதல் அட்டவணையில் (First Schedule) இடம்பெற்றுள்ள கனிமங்கள் - தொடர்பான திட்டங்களுக்கும் விலக்கு வழங்கப்படும்.

இதற்கான திட்டங்கள் எதுவும் இனி மாநில அளவிலோ அல்லது உள்ளூர் மக்களின் கருத்தோடு தொடர்பு படாமல், நேரடியாக மத்திய அரசின் மதிப்பீட்டில் முடிவெடுக்கப்படும்.

பாதுகாப்பு அமைச்சகத்தின் கோரிக்கை

பாதுகாப்பு அமைச்சகம் 04.08.2025 அன்று சுற்றுச்சூழல் அமைச்சகத்திற்கு அனுப்பிய கடிதத்தில், முக்கிய கனிமங்கள் நாட்டின் பாதுகாப்பில் மிகப்பெரிய பங்கு வகிப்பதாக விளக்கியுள்ளது.

ரேடார் மற்றும் சோனார் கண்காணிப்பு சாதனங்கள்

லேசர் மற்றும் தொடர்பியல் கருவிகள்

ஏவுகணை வழிகாட்டு அமைப்புகள்

போன்ற உயர் தொழில்நுட்ப உபகரணங்களின் உற்பத்தியில் இத்தகைய கனிமங்கள் அவசியமாக உள்ளன என்று குறிப்பிடப்பட்டுள்ளது.

எதிர்ப்பு குரல்கள்

இருப்பினும், சுற்றுச்சூழல் ஆர்வலர்கள், சமூக ஆர்வலர்கள் பலரும் இந்த முடிவை எதிர்த்து வருகின்றனர். மக்களின் பங்களிப்பை புறக்கணிப்பது, எதிர்காலத்தில் சுற்றுச்சூழல் பாதிப்புகளை அதிகரிக்கும். அடுத்த தலைமுறையின் இயற்கை வளங்கள் மற்றும் வாழ்வாதாரத்தில் பாதிப்பு ஏற்படும்.

ஜனநாயகத்தில் மக்கள் குரல் மிக முக்கியம் என்பதால், அதை விலக்குவது மக்கள் உரிமைகளை மீறும் செயல் எனவும் அவர்கள் கூறுகின்றனர்.

ஒருபுறம் தேசிய பாதுகாப்பு மற்றும் வியூக ரீதியான தேவைகள் முக்கியமானவை என்றாலும், மறுபுறம் மக்களின் வாழ்வும் சுற்றுச்சூழலின் பாதுகாப்பும் சம அளவில் முக்கியத்துவம் பெற வேண்டியவை. இந்த உத்தரவு நடைமுறைக்கு வந்தால், எதிர்காலத்தில் மக்கள் பங்கேற்பு இல்லாமல் எடுக்கப்படும் முடிவுகள் குறித்து மேலும் பல விவாதங்கள் எழும் என்பது உறுதி.